كتبت الدكتورة نهلة عيسى : دخيلو الرايق أبو دم خفيف وإلي على قلبه مراوح!! قلتولي قرض إعادة إعمار وترميم للمتضررين مو هيك!!!؟؟

يا أخي الفهم عم يشر شر، والتعامل المبتكر الإنساني مع الظرف الموضوعي ضارب لرب السما، وكمان مليون اشارة تعجب!!!؟؟

واحد منبوش من تم الموت، ومن تحت ركام جنى العمر، بالبيجاما وبدون شحاطة، وقاعد بأحسن الأحوال عالة على معتر متله، أو دار ايواء سكاجة، وبدكم ياه يطلع قرض ويسدده، ولوه ولوه ما اذكاكم، وما أرهف حسكم الانساني!!؟

ليش عمي وين رجال أعمالكم إلي متل المنشار طالع آكل ونازل آكل، ليش ما بيتنادوا أو أنتوا بتخلوهم يتنادوا لبناء ألف ولا ألفين بناية ولا أكتر لمتضرري الزلزال، وهي ملاليم بالنسبة لثرواتهم اللهم لا حسد، متل ما عملت مصر واليابان وكتير دول، وراح نسامحهم بكل شي مضى، ونعتبرهم ابطال وطنيين، وحياة الرب لنستهبل ونصفق، وبطلوا بقى تستهبلونا، بجد الجد ما عاد عنا خلق نعمل حالنا هبل واصبعتنا بتمنا.